ಪೇಜಾವರ ಮಠದಲ್ಲಿ ವೈಭವೋತ್ಸವದಿಂದ ಆಚರಿಸಲಾದ ಶ್ರೀಕೃಷ್ಣ ಲೀಲೋತ್ಸವ ಸಾಂಪ್ರದಾಯಿಕ ಗೋಕುಲಾಷ್ಟಮಿ-ಮೊಸರು ಕುಡಿಕೆ-ವಿಟ್ಲ ಪಿಂಡಿ ಉತ್ಸವ.

kallianpurdotcom: 9741001849

(ಚಿತ್ರ /  ವರದಿ : ರೋನ್ಸ್ ಬಂಟ್ವಾಳ್)

ಮುಂಬಯಿ, ಆ.೨೭: ಮುಕುಂದ ಶ್ರೀಕೃಷ್ಣ ಪರಮಾತ್ಮನ ಜನ್ಮಾಚರಣೆಯನ್ನು ಇಂದಿಲ್ಲಿ ಉಡುಪಿ ಶ್ರೀ ಪೇಜಾವರ ಅಧೋಕ್ಷಜ ಮಠದ ಸಾಂತಾಕ್ರೂಜ್ ಪೂರ್ವದ ಪ್ರಭಾತ್ ಕಾಲೋನಿಯಲ್ಲಿನ ಮುಂಬಯಿ ಶಾಖೆಯಾದ (ಮಧ್ವ ಭವನ) ಶ್ರೀ ಪೇಜಾವರ ಮಠದಲ್ಲಿ ಶ್ರೀ ಪೇಜಾವರ ಮಠ ಮುಂಬಯಿ ಹಾಗೂ ಶ್ರೀ ಪೂರ್ಣಪ್ರಜ್ಞ ವಿದ್ಯಾಪೀಠ ಪ್ರತಿಷ್ಠಾನದ ವತಿಯಿಂದ ಏಳನೇ ವಾರ್ಷಿಕ ಜನ್ಮಾಷ್ಟಮಿ ಉತ್ಸವವನ್ನಾಗಿಸಿ ಸಂಭ್ರಮ ಸಡಗರದಿಂದ ಆಚರಿಸಿದವು.

ಶ್ರೀಕೃಷ್ಣ ಜನ್ಮಾಷ್ಟಮಿ ಪ್ರಯುಕ್ತ ಉಡುಪಿ ಶ್ರೀ ಪೇಜಾವರ ಮಠಧೀಶ ಶ್ರೀ ವಿಶ್ವಪ್ರಸನ್ನ ತೀರ್ಥರ ಶುಭಾಶೀರ್ವಾ ದ, ಮಾರ್ಗದರ್ಶನಗಳೊಂದಿಗೆ ಶ್ರೀ ಕೃಷ್ಣೈಕ್ಯ ಯತಿಕುಲ ಚಕ್ರವರ್ತಿ ಶ್ರೀ ವಿಶ್ವೇಶತೀರ್ಥ ಸ್ವಾಮೀಜಿ ಅವರನ್ನು ಸ್ಮರಿಸಿ ವಾರ್ಷಿಕ ಶ್ರೀಕೃಷ್ಣಾಷ್ಟಮಿಗೆ ಚಾಲನೆಯನ್ನೀಡಲಾಯಿತು. ಪುರೋಹಿತ ರಾಘವೇಂದ್ರ ಭಟ್ ಉಂಡಾರು ಅವರು ಪುಷ್ಪಾಲಂಕಾರದೊಂದಿಗೆ ಅಲಂಕಾರ ಪೂಜೆ, ರಂಗಪೂಜೆ, ಮಹಾಪೂಜೆ ನೆರವೇರಿಸಿದರು. ಸೋಮವಾರ ಮಧ್ಯರಾತ್ರಿ ಮಠದಲ್ಲಿನ ಶ್ರೀ ಉಡುಪಿ ಶ್ರೀಕೃಷ್ಣ ಮುಖ್ಯಪ್ರಾಣ ದೇವರ ಸನ್ನಿಧಾನದಲ್ಲಿ ಪೇಜಾವರ ಮಠದ ಮುಂಬಯಿ ಮುಖ್ಯಸ್ಥ ವಿದ್ವಾನ್ ಡಾ| ರಾಮದಾಸ ಉಪಾಧ್ಯಾಯ ರೆಂಜಾಳ ಶ್ರೀಕೃಷ್ಣ ದೇವರಿಗೆ ವಿವಿಧ ಪೂಜೆಗಳೊಂದಿಗೆ ಅರ್ಚಿಸಿ ಮಹಾಮಂಗಳರಾತಿ ಅರ್ಘ್ಯ ಪ್ರಧಾನ ನೆರವೇರಿಸಿ ವಾರ್ಷಿಕ ಶ್ರೀಕೃಷ್ಣಾಷ್ಟಮಿ ಲೀಲೋತ್ಸವಕ್ಕೆ ವಿಧಿವತ್ತಾಗಿ ಚಾಲನೆಯನ್ನಿತ್ತರು.

ಮಂಗಳವಾರ ಸಂಜೆ ದಿನೇಶ್ ಕೋಟ್ಯಾನ್ ಅವರ ಸೆಕ್ಸೋಫೋನ್ ವಾದನ, ಬ್ಯಾಂಡು, ಚೆಂಡೆ, ವಾದ್ಯಗಳ ನೀನಾದದಲ್ಲಿ ಅಶೋಕ್ ಕೊಡ್ಯಡ್ಕ ತಂಡದ ಹುಲಿ ವೇಷಧಾರಿಗಳ ಕೂಡುವಿಕೆ ಹಾಗೂ ಮಠದ ಸಿಬ್ಬಂದಿಗಳ ಸಹಯೋಗದಲ್ಲಿ ಶ್ರೀ ಕೃಷ್ಣ ಲೀಲೋತ್ಸವ, ವಿಟ್ಲ ಪಿಂಡಿ ಉತ್ಸವ, ಮೊಸರುಕುಡಿಕೆ ಸಂಭ್ರಮಿಸಲಾಯಿತು. ಪುರೋಹಿತ ಸುರೇಶ್ ಭಟ್ ಕುಂಟಾಡಿ ಉತ್ಸವಮೂರ್ತಿಯೊಂದಿಗೆ ಪ್ರಭಾತ್ ಕಾಲೋನಿಯಲ್ಲಿ ಶ್ರೀ ಕೃಷ್ಣನ ಪಲ್ಲಕ್ಕಿ ಉತ್ಸವ, ಕೃಷ್ಣ ರಥೋತ್ಸವ ನೆರವೇರಿಸಿದರು.

ಮಠದ ಶ್ರೀ ವಿಶ್ವೇಶ ತೀರ್ಥ ಸಭಾಗೃಹದಲ್ಲಿ ಕೃಷ್ಣ ವೇಷಧಾರಿ ಮುದ್ದು ಮಕ್ಕಳು ಪ್ರತಿಭಾನ್ವೇಷಣೆಗೈದರು. ಸಾಂಸ್ಕೃತಿಕ ಕಾರ್ಯಕ್ರಮದ ಅಂಗವಾಗಿ ಬಿ.ಆರ್ ಹೊಟೇಲು ಸಮೂಹದ ಆಡಳಿತ ನಿರ್ದೇಶಕ ಬಿ.ಆರ್ ಶೆಟ್ಟಿ ಉಡುಪಿ ಪರಿವಾರದ ಪ್ರಾಯೋಜಕತ್ವದಲ್ಲಿ ಶ್ರೀ ವಿದ್ಯಾ ಭೂಷಣ ಸಮೂಹವು ಗಾನಸುಧಾ ಪ್ರಸ್ತುತ ಪಡಿಸಿದರು.

ಈ ಸಂದರ್ಭದಲ್ಲಿ ವಿದ್ವಾನ್ ಡಾ| ರಾಮದಾಸ ಉಪಾಧ್ಯಾಯ, ವಿದ್ವಾನ್ ಪ್ರಕಾಶ್ ಆಚಾರ್ಯ ರಾಮಕುಂಜ, ವಿದ್ವಾನ್ ಶ್ರೀಹರಿ ಭಟ್, ನಿರಂಜನ್ ಜೆ.ಗೋಗ್ಟೆ ವೇದಿಕೆಯಲ್ಲಿದ್ದು, ಸುರೇಶ್ ಭಟ್ ಕುಂಟಾಡಿ ಮತ್ತು ಕೃಷ್ಣ ವೇಷಧಾರಿ ಮುದ್ದು ಮಕ್ಕಳನ್ನು ಗೌರವಿಸಿದರು ಮತ್ತು ಕೃಷ್ಣ ವೇಷಧಾರಿಗಳಿಗೆ ವಿದ್ಯಾ ಭೂಷಣರು ಗೌರವಿಸಿ ಅಭಿನಂದಿಸಿದರು.

ಈ ಸಂದರ್ಭದಲ್ಲಿ ಶ್ರೀ ಪೂರ್ಣಪ್ರಜ್ಞ ವಿದ್ಯಾಪೀಠ ಪ್ರತಿಷ್ಠಾನದ ಅವಿನಾಶ್ ಶಾಸ್ತ್ರಿ ಮತ್ತಿತರ ಪದಾಧಿಕಾರಿಗಳು, ಸದಸ್ಯರು, ಶ್ರೀಕೃಷ್ಣ ವಿಠಲ ಪ್ರತಿಷ್ಠಾನದ ಸಂಸ್ಥಾಪಕ ವಿದ್ವಾನ್ ಕೈರಬೆಟ್ಟು ವಿಶ್ವನಾಥ್ ಭಟ್, ಪೇಜಾವರ ಮಠದ ಮುಂಬಯಿ ಇದರ ಪುರೋಹಿತರಾದ ಪವನ್ ಭಟ್ ಅಣ್ಣಿಗೇರಿ, ಬೆಳ್ಳೆ ರಾಮಚಂದ್ರ ಸಾಮಗ, ಶ್ರೀನಿವಾಸ ಭಟ್ ಪರೇಲ್ ಮತ್ತಿತರರು, ಭಕ್ತಾದಿಗಳಾದ ಬಿ.ಆರ್ ಶೆಟ್ಟಿ ಉಡುಪಿ (ವಳಕಾಡು), ಶೇಖರ್ ಜೆ.ಸಾಲಿಯಾನ್, ದೇವೇಂದ್ರ ಬಂಗೇರಾ, ಶೇಖರ್ ಸಸಿಹಿತ್ಲು ಸೇರಿದಂತೆ ಅಪಾರ ಭಕ್ತಾಭಿಮಾನಿಗಳು ಉಪಸ್ಥಿತರಿದ್ದು ಜನ್ಮಾಷ್ಟಮಿ ಸಂಭ್ರಮಿಸಿದರು.  ರಾತ್ರಿ ಶ್ರೀ ಕೃಷ್ಣನ ಮಹಾ ಪೂಜೆ, ಮಹಾ ಮಂಗಳಾರತಿ ನಡೆಸಿ ಶ್ರೀಕೃಷ್ಣ ಭಕ್ತರಿಗೆ ಪ್ರಸಾದ ವಿತರಿಸಿ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮಗಳೊಂದಿಗೆ ವಾರ್ಷಿಕ ಶ್ರೀಕೃಷ್ಣಾಷ್ಟಮಿ ಸಮಾಪ್ತಿಗೊಂಡಿತು.