ವೆಲ್‌ವಿನ್ ಸಂಸ್ಥೆಗೆ ಪ್ರತಿಷ್ಠಿತ ‘ಇಕಾನಾಮಿಕ್ ಟೈಮ್ಸ್’ ಪ್ರಶಸ್ತಿ ಪ್ರದಾನ.

kallianpurdotcom: Mob 9741001849

(ಚಿತ್ರ /ವರದಿ : ರೋನ್ಸ್ ಬಂಟ್ವಾಳ್) 

ಮುಂಬಯಿ, ಮಾ.26:  ಕಾರ್ಕಳ ಅತ್ತೂರು ಮೂಲತಃ ವೆಲ್-ವಿನ್ ಸಂಸ್ಥೆಯ ಕಾರ್ಯಾಧ್ಯಕ್ಷ ಮತ್ತು ಆಡಳಿತ ನಿರ್ದೇಶಕ ವಿನ್ಸೆಂಟ್ ಮಥಾಯಸ್ ಅವರ ಬೃಹನ್ಮುಂಬಯಿಯಲ್ಲಿನ ಪ್ರತಿಷ್ಠಿತ ಮತ್ತು ವಿಶ್ವ ಪ್ರಸಿದ್ಧ ಕಾರ್‍ಯುಗೇಟೆಡ್ (ನಿರಿಗೆಗಟ್ಟು) ಉತ್ಪಾದನಾ ಸಂಸ್ಥೆ ವೆಲ್‌ವಿನ್ ಕಂಪೆನಿಗೆ ಕಳೆದ ಬುಧವಾರ ನವದೆಹಲಿಯಲ್ಲಿನ ಲೀ ಮರೆಡಿಯಾನ್ ಸ್ಟಾರ್ ಹೊಟೇಲ್‌ನಲ್ಲಿ ನಡೆಸಲ್ಪಟ್ಟ ಸಮಾರಂಭದಲ್ಲಿ ‘ಇಕಾನಾಮಿಕ್ ಟೈಮ್ಸ್’ ಸಂಸ್ಥೆಯು ಭಾರತದ ಅತಿ ವೇಗವಾಗಿ ಬೆಳೆಯುತ್ತಿರುವ ಮಧ್ಯಮ ವರ್ಗ (ಎಂಎಸ್‌ಎಂಇ) ಸಂಸ್ಥೆ ಹೆಗ್ಗಳಿಕೆಯ ಪ್ರಶಸ್ತಿ ಪ್ರದಾನಿಸಿ ಗೌರವಿಸಿತು.

ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಅತಿಥಿ ಅಭ್ಯಾಗತರುಗಳಾಗಿ ಭಾರತದಲ್ಲಿನ ಡೆನ್ಮಾರ್ಕ್ ರಾಯಭಾರ ಕಚೇರಿಯ ಪ್ರಥಮ ಕಾರ್ಯದರ್ಶಿ ಮಥಾಯಸ್ ಎಮಿಲ್ ಬೆಂಗ್ಟ್‌ಸನ್, ಕೇರ್ ರೇಟಿಂಗ್ಸ್ ಲಿಮಿಟೆಡ್‌ನ ಸಹಾಯಕ ನಿರ್ದೇಶಕರುಗಳಾದ ಸಜ್ನಿ ಶ್ಹಾ ಮತ್ತು ಜಿಗ್ನೇಶ್ ತ್ರಿವೇದಿ ಉಪಸ್ಥಿತರಿದ್ದು ವೆಲ್‌ವಿನ್ ಸಂಸ್ಥೆಯ ಕಾರ್ಯಾಧ್ಯಕ್ಷ ಮತ್ತು ಆಡಳಿತ ನಿರ್ದೇಶಕ ವಿನ್ಸೆಂಟ್ ಮಥಾಯಸ್ ಮತ್ತು ನಿರ್ದೇಶಕ ವರ್ಣನ್ ಮಥಾಯಸ್ ಇವರಿಗೆ ಗೌರವ ಪತ್ರ, ಪ್ರಶಸ್ತಿ ಫಲಕ ನೀಡಿ ಗೌರವಿಸಿ ಅಭಿನಂದಿಸಿದರು.

ವೆಲ್‌ವಿನ್ ಕಂಪೆನಿ:
ಭಾರತದ ಪ್ಯಾಕೇಜಿಂಗ್ ಕ್ಷೇತ್ರದಲ್ಲಿ ಗಮನಾರ್ಹ ಸಾಧನೆ ಮಾಡಿರುವ ವೆಲ್-ವಿನ್ ಸಂಸ್ಥೆಯ ಯಶೋಗಾಥೆ ೧೯೮೭ರಲ್ಲಿ ಸಣ್ಣ ಮಟ್ಟದ ಕಾರ್‍ಯುಗೇಟೆಡ್ (ನಿರಿಗೆಗಟ್ಟು) ಉತ್ಪಾದನಾ ಘಟಕದಿಂದ ಆರಂಭವಾಯಿತು. ಆದರೆ ಆ ಆರಂಭ ಕೇವಲ ಸಣ್ಣ ಪ್ರಯತ್ನವಾಗಿ ಉಳಿಯದೆ, ಕಾಲಕ್ರಮೇಣ ಭಾರತದಲ್ಲಿನ ಕರಗೇಟೆಡ್ ತಯಾರಿಕಾ ಕ್ಷೇತ್ರದಲ್ಲಿ ಮುಂಚೂಣಿ ಸಂಸ್ಥೆಯಾಗಿ ಬೆಳೆಯಿತು. ದೇಶದ ವಿವಿಧ ಭಾಗಗಳಲ್ಲಿ ನಾಲ್ಕು ಉತ್ಪಾದನಾ ಘಟಕಗಳನ್ನು ಸ್ಥಾಪಿಸುವ ಮೂಲಕ ಸಂಸ್ಥೆ ತನ್ನ ಬಲವಾದ ಹಾಜರಾತಿಯನ್ನು ನಿರ್ಮಿಸಿತು ಎಂದು ವೆಲ್‌ವಿನ್ ಕಾರ್ಯಾಧ್ಯಕ್ಷ ವಿನ್ಸೆಂಟ್ ಮಥಾಯಸ್ ತಿಳಿಸಿದರು.

ಸಂಸ್ಥೆಯ ಬೆಳವಣಿಗೆ ಮತ್ತು ಸಾಮರ್ಥ್ಯಗಳು ಹೆಚ್ಚಾದಂತೆ ವಿದೇಶಿ ನೇರ ಹೂಡಿಕೆಯನ್ನು (ಎಫ್‌ಡಿಐ) ಆಕರ್ಷಿಸುವ ಮಟ್ಟಕ್ಕೆ ತಲುಪಿತು. ಇದರ ಫಲವಾಗಿ ಜಪಾನ್‌ನ ಕಂಪನಿಯೊಂದರೊಂದಿಗೆ ಜಂಟಿ ಹೂಡಿಕೆ ರೂಪಗೊಂಡು ಚೆನ್ನೈನಲ್ಲಿ ನಾಲ್ಕನೇ ಉತ್ಪಾದನಾ ಘಟಕ ಸ್ಥಾಪಿಸಲಾಯಿತು. ಈ ಸಾಧನೆಯೊಂದಿಗೆ ವೆಲ್-ವಿನ್ ಜಾಗತಿಕ ಪ್ಯಾಕೇಜಿಂಗ್ ನಕ್ಷೆಯಲ್ಲಿ ತನ್ನ ಸ್ಥಾನವನ್ನು ಗಟ್ಟಿಗೊಳಿಸಿತು.

ಈ ಬೆಳವಣಿಗೆಯ ಹಾದಿಯಲ್ಲಿ ಸಂಸ್ಥೆಯ ಎರಡನೇ ತಲೆಮಾರಿನವರು ಕೂಡ ವ್ಯವಹಾರಕ್ಕೆ ಸೇರಿದರು. ಸಂಸ್ಥಾಪಕರ ಪುತ್ರರಾದ ವರ್ಣನ್ ಮಥಾಯಸ್ ಮತ್ತು ವರ್ಟನ್ ಮಥಾಯಸ್ ಸಂಸ್ಥೆಗೆ ಸೇರ್ಪಡೆಯಾ ಗಿ, ಸಂಸ್ಥೆಯ ದೃಷ್ಟಿ ಮತ್ತು ಅಭಿವೃದ್ಧಿಯನ್ನು ಮತ್ತಷ್ಟು ಬಲಪಡಿಸಿದ್ದು, ೨೦೧೯ರಲ್ಲಿ ಚೀನಾದ ಶಾಂಘೈ ನಗರದಲ್ಲಿ ನಡೆದ ಸೈನೋ ಕೊರಗೇಶನ್ ಕಾರ್ಯಕ್ರಮದಲ್ಲಿ ‘ವಿಶ್ವದ ಅತ್ಯುತ್ತಮ ಘಟಕ ಪ್ರಶಸ್ತಿ’ಗೆ (ವರ್ಲ್ಡ್ ಕಾರ್‍ಯುಗೇಟೆಡ್ ಅವಾರ್ಡ್ ಫಾರ್ ಬೆಸ್ಟ್ ಪ್ಲಾಂಟ್) ಭಾಜನವಾಗಿದ್ದು ಸಂಸ್ಥೆಯ ಪಯಣದಲ್ಲಿ ಮಹತ್ವದ ಘಟ್ಟವಾಯಿತು. ಆ ವೇದಿಕೆಯಲ್ಲಿ ಭಾರತವನ್ನು ಪ್ರತಿನಿಧಿಸುವುದು ಮತ್ತು ಭಾರತೀಯ ಉತ್ಪಾದನಾ ಕ್ಷೇತ್ರದ ಸಾಮರ್ಥ್ಯವನ್ನು ಜಾಗತಿಕ ಮಟ್ಟದಲ್ಲಿ ಪ್ರದರ್ಶಿಸುವುದು ಸಂಸ್ಥೆಗೆ ಹೆಮ್ಮೆಯ ಕ್ಷಣವಾಗಿದೆ.

ಐದು ವರ್ಷಗಳ ಹಿಂದೆ ಸಂಸ್ಥೆ ಜಾಗತಿಕ ಮಾರುಕಟ್ಟೆಗಳನ್ನು ಗುರಿಯಾಗಿಸಿಕೊಂಡು ವಿಶ್ವಮಟ್ಟದ, ಸ್ಥಿರತೆಯ ಪ್ಯಾಕೇಜಿಂಗ್ ಕಂಪನಿಯನ್ನು ನಿರ್ಮಿಸುವ ದೃಷ್ಟಿಯೊಂದಿಗೆ ಹೊಸ ಪ್ರಯತ್ನ ಆರಂಭಿಸಿತು. ಈ ದೃಷ್ಟಿಯ ಭಾಗವಾಗಿ ಪೇಪರ್ ಬ್ಯಾಗ್ ಉತ್ಪಾದನೆ ಹಾಗೂ ಆಹಾರ ಪ್ಯಾಕೇಜಿಂಗ್ ಪರಿಹಾರಗಳ ಕ್ಷೇತ್ರಕ್ಕೂ ಸಂಸ್ಥೆ ವಿಸ್ತರಿಸಿತು. ವಿಶ್ವಮಟ್ಟದ ಮೂಲಸೌಕರ್ಯ ಮತ್ತು ಉತ್ತಮ ಕಾರ್ಯನಿರ್ವಹಣೆಯ ಮೇಲೆ ಒತ್ತು ನೀಡುವ ಮೂಲಕ ಈ ಪ್ರಯತ್ನವನ್ನು ಮುಂದುವರಿಸಲಾಯಿತು.

ಅಲ್ಪಕಾಲದಲ್ಲೇ ಸಂಸ್ಥೆ ಜಾಗತಿಕ ಮಟ್ಟದ ಪೂರೈಕೆದಾರನಾಗಿ ಬೆಳೆಯಿತು. ಆರು ಖಂಡಗಳಿಗೆ ಉತ್ಪನ್ನಗಳನ್ನು ರವಾನಿಸುವುದರೊಂದಿಗೆ ವರ್ಷಕ್ಕೆ  ಸಾವಿರಕ್ಕೂ ಅಧಿಕ ಕಂಟೇನರ್‌ಗಳನ್ನು ರಫ್ತು ಮಾಡುವ ಮಟ್ಟಕ್ಕೆ ತಲುಪಿತು. ಭಾರತ ಸರ್ಕಾರದಿಂದ ‘ಎಕ್ಸ್‌ಪೋರ್ಟ್ ಹೌಸ್’ಎಂದು ಮಾನ್ಯತೆ ಪಡೆದ ಸಂಸ್ಥೆಗೆ ಗೋವಾದಿಂದ ಅತ್ಯಧಿಕ ವಿದೇಶಿ ವಿನಿಮಯ ಸಂಪಾದನೆಗಾಗಿ ಎಫ್‌ಐಇಒ ಪ್ರಶಸ್ತಿಯೂ ಲಭಿಸಿತು.

ಇದೀಗ ಸಂಸ್ಥೆ ಮತ್ತೊಂದು ಮಹತ್ವದ ಸಾಧನೆ ದಾಖಲಿಸಿದ್ದು, ವೆಲ್-ವಿನ್ ಗ್ರೂಪ್‌ನ ಭಾಗವಾಗಿ ಕೇವಲ ಐದು ವರ್ಷಗಳಲ್ಲಿ ಬೆಳೆದ ಈ ಕಂಪನಿಗೆ ‘ಇಕಾನಾಮಿಕ್ ಟೈಮ್ಸ್’ ವತಿಯಿಂದ ಭಾರತದ ಅತಿ ವೇಗವಾಗಿ ಬೆಳೆಯುತ್ತಿರುವ ಮಧ್ಯಮ ವರ್ಗ (ಎಂಎಸ್‌ಎಂಇ) ಸಂಸ್ಥೆ ಎಂಬ ಪ್ರಶಸ್ತಿ ಲಭಿಸಿದೆ. ವೇಗ ಮತ್ತು ಗುಣಮಟ್ಟದ ಬೆಳವಣಿಗೆಯೇ ಈ ಗೌರವಕ್ಕೆ ಕಾರಣವಾಗಿದೆ.

ಈ ಸಾಧನೆ ಸಂಸ್ಥೆಯ ಪ್ರತಿಯೊಬ್ಬ ಸಿಬ್ಬಂದಿಯ ಪರಿಶ್ರಮದ ಫಲವಾಗಿದೆ. ಕಾರ್ಮಿಕರು, ಚಾಲಕರು, ವಿವಿಧ ತಲೆಮಾರಿನ ತಂಡದ ಸದಸ್ಯರು ಮತ್ತು ಜಾಗತಿಕ ಮಾನದಂಡಗಳನ್ನು ಒದಗಿಸಲು ಭಾರತೀಯ ಸಂಸ್ಥೆಯ ಮೇಲೆ ವಿಶ್ವಾಸವಿಟ್ಟ ಗ್ರಾಹಕರು ಎಲ್ಲರೂ ಈ ಯಶಸ್ಸಿನ ಪಾಲುದಾರರು. ಜೊತೆಗೆ ಸಂಸ್ಥೆಯ ಕುಟುಂಬದವರೂ, ವಿಶೇಷವಾಗಿ ವರ್ಣನ್ ಮಥಾಯಸ್ ಮತ್ತು ವರ್ಟನ್ ಮಥಾಯಸ್ ಅವರ ಪಾತ್ರವೂ ಮಹತ್ವದ್ದಾಗಿದೆ. ಸ್ಥಿರತೆಯ ಪ್ಯಾಕೇಜಿಂಗ್ ವ್ಯವಹಾರ ನಡೆಸುತ್ತಿದ್ದರೂ, ಸಂಸ್ಥೆ ವಾಸ್ತವವಾಗಿ ಪ್ಯಾಕೇಜ್ ಮಾಡುತ್ತಿರುವುದು ‘ವಿಶ್ವಾಸ’ಎಂದು ಸಂಸ್ಥೆಯವರು ಹೇಳಿದ್ದಾರೆ. ಇತ್ತೀಚೆಗೆ ದೊರೆತ ಗೌರವವು ಆ ವಿಶ್ವಾಸಕ್ಕೆ ದೊರೆತ ಮಾನ್ಯತೆಯಾಗಿದೆ. ‘ಇಕಾನಾಮಿಕ್ ಟೈಮ್’ ನೀಡಿದ ಈ ಗೌರವಕ್ಕೆ ಸಂಸ್ಥೆ ಕೃತಜ್ಞತೆ ವ್ಯಕ್ತಪಡಿಸಿದ್ದು, ಮುಂದಿನ ದಿನಗಳಲ್ಲಿ ಇನ್ನಷ್ಟು ಸಾಧನೆ ಮಾಡುವ ನಂಬಿಕೆ ವ್ಯಕ್ತಪಡಿಸಿದೆ.

ವಿನ್ಸೆಂಟ್ ಮಥಾಯಸ್ ಅವರು ಕ್ರಿಶ್ಚನ್ ಛೇಂಬರ್ ಆಫ್ ಕಾಮರ್ಸ್ ಎಂಡ್ ಇಂಡಸ್ಟ್ರೀಸ್ ಸಂಸ್ಥೆಯ ಸ್ಥಾಪಕ ಕಾರ್ಯಾಧ್ಯಕ್ಷರಾಗಿದ್ದು ಪ್ರಸ್ತುತ ಮೊಡೇಲ್ ಕೋ.ಆಪರೇಟಿವ್ ಬ್ಯಾಂಕ್ ಲಿಮಿಟೆಡ್‌ನ ನಿರ್ದೇಶಕ ಆಗಿದ್ದು ಇನ್ನಿತರ ಸಂಘಸಂಸ್ಥೆಗಳಲ್ಲಿ ಸೇವಾ ನಿರತರಾಗಿದ್ದಾರೆ.